பிஸ்மில்லாஹ் ஹிர்ரஹ்மானிர் ரஹீம்
புதிய தமிழ் முஸ்லிம் டிவி சேனல்
(CRESCENT TV 24 HOURS CHANNEL)
கிரஸண்ட் டிவிக்கு எங்கள் மனமார்ந்த வாழ்த்துக்கள்.
சூரியனையே திருப்பிச் சுடும் பாலையில் - திரைக் கடல் ஓடி திரவியம் தேட அலைகடல் தாண்டி அரபகம் வந்த தமிழ் நெஞ்சங்களுக்கு வரப்பிரசாதமாய் வந்த கிரஸண்ட் - பிறை டிவியே.,
மனித அறிவை திசை திருப்ப கேளிக்கைகளும், கச்சேரிகளும், காட்சிகளாய் கடை விரிக்கும் காலத்தில் - சிந்தனையைத் தூண்டும் செந்தமிழாய் வளைகுடாவைக் கலக்க வரும் கிரஸண்ட் டிவியே,
இந்தியா என்பது மதங்களின் சங்கமம் என்று பொருள். மதங்களுக்கே மதம் பிடிக்கும் காலத்தில் மனிதனை புனிதனாக்கும் ஏற்றமிகு இஸ்லாத்தின் எழிலார்ந்த கருத்துக்களை சொல்ல வந்த கிரஸண்ட் - பிறை டிவியே,
ஏய்ப்பவருக்கு ஏவல் செய்யும் காலத்தில் - எடுத்த கருத்தை எவர் நின்று தடை புரிந்தாலும் - உண்மையை உலகுக்கு சொல்ல வந்த கிரஸண்ட் டிவி சொல் அமுதமே,
தொலைக் காட்சிகள் எல்லாம் தொல்லைக் காட்சிகளாய் மாறிவிட்ட காலத்தில் தொல் தமிழர் இஸ்லாமிய வரலாற்றை தோல் உரித்து காட்டட்டும் கிரஸண்ட் டிவி – ஆம் தமிழ் பூமிக்கு நம்மவர் ஆற்றியதை எடுத்துச் சொல்லட்டும்.
மனித நேயம் மடிந்து விட்ட காலத்தில் - தமிழன் உவந்து அளித்த மானுட நேயத்தை தட்டி எழுப்ப வந்து இருக்கும் கிரஸண்ட் டிவியே – வற்றாத சிரபுஞ்சியாய் உம் காட்சிகள் விழிகளுக்கு விருந்தாய் இருக்கட்டும், ஆம் தமிழர் உள்ளமெல்லாம் நனையட்டும்.
கிரஸண்ட் டிவியே, ஈச்ச மரத்தின் சுவாசக் காற்றாய் கலந்து மணம் கமழட்டும் - தமிழ் முஸ்லிம் செய்திகளை ஒட்டகமாய் மணல் மேடுகளில் சுமந்து வரட்டும் - வான் வெளியில் வைகறையாய் தட்டி எழுப்பட்டும்.
காலத்தை கணிக்கும் பிறை டிவியே – நீ கூன் பிறையாய்; நில்லாமல் வளர் பிறையாய் வளர்ந்து – நாட்டிற்கும், மானுடத்திற்கும் பயன் பெற்று இறை அருள் பெற வாழிய, வாழிய என வாழ்த்துகிறோம்.
கிரஸண்ட் டிவியே தொடங்கட்டும் உம் பணி, முழங்கட்டும் உம் முழக்கம் - கத்தும் கடல் கிழித்து கதிரவனாய் எழட்டும் - காரிருளை பொசுக்கட்டும் - கல் மனம் கொண்டவரின் கயமைத்தனம் ஒழியட்டும்.
மானுடம் மனித நேயத்தில் மிளிரட்டும்
தமிழன் தலை நிமிர்ந்து நிற்கட்டும்
குறிப்பு : கடந்த வெள்ளியன்று (23-06-2006) இது தன் ஒளிபரப்பை தொடங்கியது. 24 மணி நேர சேவை.
இவண்
இந்திய மக்கள் பேரவை
வளைகுடா நாடுகள்
No comments:
Post a Comment